Монгол Улсын Ерөнхийлөгчийн 2003 оны 105 дугаар зарлигаар жил бүрийн 5 дугаар сарын эхний ням гарагийг “Үндэсний бичиг үсгийн баяр”-ын өдөр болгож, үндэсний хэл бичиг, түүнтэй холбогдолтой ёс заншил, уламжлал, өвийг судлах, сурталчлах, уламжлан өвлүүлэх, хүүхэд залуучуудад үндэсний бичгээ сурах хүсэл сонирхол төрүүлэх, эрмэлзэлд нь дэмжлэг үзүүлэх зэргээр өргөн олонд хүртээлтэй их ажил өрнүүлэн ард нийтээрээ тэмдэглэдэг уламжлалтай.
Энэ өдөр бид монгол туургатны хэдэн зууны турш өвлөн уламжилж, хэрэглэн ирсэн үндэсний бичгийн эртний нэгэн дурсгал болох Гүюг хааны тамгын бичгийг онцлон хүргэж байна. Уг бичиг нь Их Монгол улсын их хааны сүр хүчийг илтгэсэн гайхамшигт соёлын өв төдийгүй монгол хаадын тамгын дардасны хамгийн эртний дурсгал юм. Ромын пап IV Иннокентийн элч Плано Карпини 1246 онд Их Монгол улсын их хаан Гүюгт бараалхан пап ламын захидлыг дамжуулсан түүүхтэй. Гүюг хаан хариу захидлыг монгол, латин, саррацин (перс) хэлээр бичиж илгээсэн бөгөөд уг захидал дээр монголын их хааны тамгыг хоёр удаа дарсан байдаг байна.
1920 онд түүхч Кирилл Королевский Ватиканы нууц архивт судалгаа хийж байхдаа энэхүү захидлын перс хэл дээрхи бичвэрийг олж илрүүлсэн бол 1923 онд Францын монголч эрдэмтэн Поль Пеллио тамгын бичгийг уншиж олон нийтэд толилуулсан байна.
Та бүхэн найман зууны тэртээх Их Монгол улсын далай хааны тамгын бичгийг гэр бүлийн хамтаар уншин, түүх, бичиг үсгийн соёлоороо аялна уу.
ОРХОН АЙМГИЙН УЛСЫН БҮРТГЭЛИЙН ХЭЛТЭС
