Хууль зүй, дотоод хэргийн сайд Х.Нямбаатарын санаачилгаар гадаад улсад оршин сууж байгаа Монгол Улсын иргэдэд улсын бүртгэлийн үйлчилгээг хүртээмжтэй, шуурхай үзүүлэх, тоон гарын үсэг олгох зорилгоор Монгол Улсаас Канад Улсад суугаа Элчин сайдын яам, Америкийн Нэгдсэн Улсад суугаа Элчин сайдын яам, Сан-Франциско дахь Ерөнхий Консулын газар, Чикаго дахь Консулын газрыг иргэний улсын бүртгэлийн сүлжээнд холболоо.
Иргэний улсын бүртгэлийн сүлжээнд холбогдсоноор тус улсуудад оршин сууж байгаа Монгол Улсын иргэдэд иргэний улсын бүртгэлийн 21 төрлийн лавлагаа олгох, төрсний, эцэг /эх/ тогтоосны, гэрлэсний, гэрлэлт сэргээсний, гэрлэлт дуусгавар болсны, нас барсны, биеийн давхцахгүй өгөгдлийн /гарын хурууны хээ/, иргэний үнэмлэхийн, гадаад паспортын бүртгэлийн үйлчилгээг шууд үзүүлэх боломжтой боллоо.
Түүнчлэн тоон гарын үсэг олгосноор төрийн цахим үйлчилгээний нэгдсэн систем /E-Mongolia.mn/-д нэвтэрч, төрийн байгууллагын бусад үйлчилгээг цахим хэлбэрээр авах боломжийг бүрдүүллээ.
Монгол Улсаас хилийн чанадад ажиллаж байгаа Дипломат төлөөлөгчийн газрыг иргэний улсын бүртгэлийн онлайн сүлжээнд холбож, гадаад улсад оршин сууж байгаа Монгол Улсын иргэдэд тоон гарын үсэг олгосноор Монгол Улсын иргэд иргэний улсын бүртгэлийн үйлчилгээ болон төрийн бусад үйлчилгээг орон зай, цаг хугацаанаас үл хамааран түргэн шуурхай авах, боломж бүрдэж байгаагийн зэрэгцээ иргэдээс гарах зардал, цаг хугацааг хэмнэх ач холбогдолтой боллоо.
