“24/7 цахим үйлчилгээний төв”-ийг ажиллуулж эхэллээ

Улсын бүртгэлийн байгууллага нь  хамгийн анхны  “24/7 цахим төв”-өө нээлээ. Уг төв 100 айл дахь УБЕГ-ын төв байрны 1 дүгээр давхарт байрлаж байгаа бөгөөд иргэн та цаг хугацаанаас үл хамааран ажлын бус өдөр, ажлын бус цагаар буюу хүссэн үедээ 24 цагаар ажиллах энэхүү төвөөс үйлчилгээ авах боломжтой юм. Цаашид бид орон нутаг, нийслэл дүүрэгт 24/7 цахим төвөө нэмж ажиллуулахаар бэлтгэл ажлыг ханган ажиллаж байна.

/Улсын бүртгэлийн цахим машин КИОСК/

Цахим төв нээгдсэнээр дараах давуу талууд бүрдэх юм. Үүнд:

Ажлын бус өдөр, ажлын бус цагаар буюу 24 цагаар үйлчилгээ авна.

Иргэнээс гарах зардал буурч цаг хугацаа хэмнэгдэнэ.

Үйлчилгээний шат дамжлагыг бууруулж иргэн, хуулийн этгээд төрд байгаа өөрийн мэдээллийг саадгүй авах боломж бүрдэнэ.

Тус төвөөр үйлчлүүлж буй танд ажлын цагаар улсын бүртгэгч зөвлөн туслах үйлчилгээг үзүүлэх бөгөөд ажлын бус цагаар иргэн та өөртөө үйлчлэн улсын бүртгэлийн үйлчилгээний цахим машин КИОСК-оос улсын бүртгэлийн 6 төрлийн үйлчилгээ, 18 төрлийн лавлагааг цагийн хязгааргүй авах боломжтой.