Улсын бүртгэлийн байгууллагын 2025 оны удирдах ажилтны сургалт, зөвлөгөөн 03-р сарын 31, 04-р сарын 01-ний өдрүүдэд Улаанбаатар хотноо зохион байгуулагдаж байна. Байгууллагын бодлого төлөвлөлт, дотоод үйл ажиллагааг шуурхай, нэгдсэн удирдлагаар хангах, цаг үеийн нөхцөл байдлын талаар санал, мэдээлэл солилцох, төв, орон нутаг дахь зохион байгуулалтын нэгжийн удирдлагын манлайллыг дээшлүүлэх, үүрэг чиглэл, зөвлөмж өгөх зорилготой юм.
Сургалт, зөвлөгөөнд Улсын бүртгэлийн ерөнхий газрын зохион байгуулалтын нэгж, нийслэлийн Улсын бүртгэлийн газар, аймаг, дүүргийн, хэлтсийн болон Хуулийн этгээд, эд хөрөнгийн эрхийн улсын бүртгэлийн тасгийн дарга нар тус тус хамрагдаж байна.
Удирдах ажилтны сургалт зөвлөгөөнийг нээж даргын албан үүргийг түр орлон гүйцэтгэгч У.Болдхүү үг хэллээ.
“Энэ жил бид бүхэн улсын бүртгэлийн багц дөрвөн хуулийн төслийн шинэчилсэн нэмэлт өөрчлөлтийг Улсын их хурал, Засгийн газарт өргөн барихаар төлөвлөн ажиллаж байна. Бодлогын хүрээнд хууль шүүхийн байгууллагуудтай хамтран ажиллах, хууль хэрэглээний хувьд албан хаагчдадаа сургаж дадлагажуулах, их өгөгдөлд суурилсан дүн шинжилгээ хийж нэгдсэн арга зүйг бий болгоно. Их өгөгдлийн хүрээнд цаашдаа бодлого шийдвэр гаргах процесст тоон үзүүлэлт, өгөгдөл, түүн дээр хийсэн дүн шинжилгээнд үндэслэн шийдвэр гаргадаг болно. Тиймээс бид байгууллагын бүтцийн хүрээнд өгөгдлийн шинжилгээ, бүтээгдэхүүн хариуцсан мэргэжилтнүүдийг бий болгоно. Улсын их хурал, Засгийн газраас хэрэгжүүлж буй дахин инженерчлэл буюу шийдвэр гаргалтын процессыг түргэн, шуурхай хурдан болгох системийн хөтөлбөрийг энэ жил хэрэгжүүлж эхлэхээр төлөвлөөд байна. Бид 2025 онд ажиллах орчин нөхцөлийг сайжруулж, үүнтэй холбоотой тодорхой дорвитой хийсэн ажилтай, бүтээсэн үйлтэй ийм жил болно гэж зорьж байна” гэлээ.
Түүнчлэн, Улсын бүртгэлийн ерөнхий газар нь 2025 оны зорилтыг “Төрийн бүтээмж, нийгмийн баталгааг хэрэгжүүлэх жил” болгон зарлалаа.
Мөн удирдах ажилтны сургалт зөвлөгөөнд Хууль зүй, дотоод хэргийн яамны төрийн нарийн бичгийн дарга Н.Мягмар, Төрийн захиргааны удирдлагын газрын дарга Г.Болормаа нар оролцож албан хаагчдад мэдээлэл өглөө.
Хууль зүй, дотоод хэргийн яамны төрийн нарийн бичгийн дарга Н.Мягмар: “Улсын бүртгэлийн байгууллага нь хууль ёсны эрхийг хамгаалах, төрийн үйлчилгээг хүртээмжтэй, найдвартай хүргэх үүрэгтэй стратегийн онц чухал байгууллагын нэг билээ. Тиймээс удирдах ажилтнуудын манлайлал, хяналт, хариуцлага онцгой ач холбогдолтой бөгөөд дараах 5 чиглэлийг анхаарах шаардлагатай.
Нэгдүгээрт, шударга, ил тод байдлыг хангах чиглэл: бүртгэлийн процессын бүх шатанд авлига, хээл хахуулаас ангид, хүнд суртлыг арилгах бодлогыг хэрэгжүүлэх, иргэдэд тэгш, шуурхай, ойлгомжтой үйлчилгээ үзүүлэх, өгөгдөл, мэдээллийг нээлттэй найдвартай хадгалах, хамгаалах нь чухал юм.
Хоёрдугаарт, хууль эрх зүйн мэдлэгийг байнга нэмэгдүүлэх чиглэл: хууль тогтоомж нийгмийн харилцааг даган байнга шинэчлэгдэж байдаг тул удирдах ажилтнууд хууль тогтоомжийн өөрчлөлтийг цаг тухай бүрд судалж хэрэгжилтийг хангах, ажилтнуудаа тогтмол сургалтад хамруулж мэдлэгийг дээшлүүлэх, иргэдэд хууль эрх зүйн мэдээллийг зөв, ойлгомжтой хүргэхэд анхаарах шаардлагатай.
Гуравдугаарт, цахим шилжилт, инновацыг дэмжих чиглэл: цахим системийг хөгжүүлэх, дэвшилтэд технологийг нэвтрүүлэх, ажилтнуудын ёс зүй, хандлагыг онцгой анхааран ажиллах.
Дөрөвдүгээрт, түргэн, шуурхай үйлчилгээг үзүүлэх чиглэл: иргэдийн санал хүсэлтийг сонсож, үйлчилгээгээ байнга сайжруулах, үйлчилгээг түргэн шуурхай, хүнд суртлыг багасгаж ажилтнуудын харилцаа хандлагын соёлыг дээшлүүлэхэд онцгой анхаарах шаардлагатай.
Тавдугаарт, ажилтнуудын мэргэжил, сахилга батыг сайжруулах чиглэл: ажилтнууддаа үлгэр дуурайлал үзүүлэх, ёс зүйтэй байх, хариуцлагын тогтолцоог сайжруулах, үр дүнг бодитой үнэлэх, багийн ажиллагааг дэмжиж ажлын бүтээмжийг нэмэгдүүлэхэд анхаарах шаардлагатай байна.
Улсын бүртгэлийн байгууллагын удирдах ажилтнууд та бүхэн нийгэмд хүлээсэн хариуцлагаа ухамсарлаж ил тод, шударга, цахим шилжилтэд нийцсэн иргэдэд ээлттэй, үр дүнтэй менежментийг хэрэгжүүлэх ёстой”
Чулуундоржийн Энхмөнхийг “Хүндэт дэвтэр”-т бичлээ
Тэрбээр Улсын бүртгэлийн байгууллагад 27 жил, үүнээс Өмнөговь аймгийн улсын бүртгэлийн хэлтсийн даргаар 15 жил ажиллахдаа хууль, тогтоомжийн хэрэгжилтийг хангах, албан хаагчдын ажиллах орчин нөхцөлийг сайжруулахад идэвх, зүтгэл, үр дүн гаргаж ажилласан тул Улсын бүртгэлийн ерөнхий газрын даргын тушаалаар агентлагийн “Хүндэт дэвтэр”-т бичиж алдаршуулав.
.jpg)
