Нотариатч Улсын бүртгэлийн асуудал эрхэлсэн төрийн захиргааны байгууллагатай гэрээ байгуулсны үндсэн дээр мэдүүлэг гаргагчийн улсын бүртгэлийн байгууллагад гаргасан мэдүүлэг, холбогдох баримт бичгийг хуулийн шаардлага хангуулан, мэдүүлэг гаргагчийн хүсэлтээр улсын бүртгэлийн мэдээллийн санд илгээх, зуучлах ЗУУЧЛАЛЫН МОДУЛЬ-ийг хөгжүүлээд байна.
Энэхүү хөгжүүлэлтийг Цахим нотариатын системд нэвтрүүлэх, Улсын бүртгэлийн байгууллагад цахимаар илгээх, бүртгэхтэй холбоотой сургалтыг Улсын бүртгэлийн ерөнхий газар, Монголын нотариатчдын танхим, “Интерактив” ХХК хамтран 2025 оны 04 дүгээр сарын 05-ны өдөр зохион байгууллаа.
Сургалтад УБЕГ-ын даргын албан үүргийг түр орлон гүйцэтгэгч У.Болдхүү, Эд хөрөнгийн эрхийн улсын бүртгэлийн газрын дарга Б.Ариунболд, улсын /ахлах/ бүртгэгч нар, ахлах мэргэжилтэн, мэргэжилтэн, нийслэлийн төвийн 6 дүүргийн улсын бүртгэлийн хэлтсийн тасгийн дарга нар болон нийслэлийн тойргийн нотариатчид танхимаар, орон нутгийн улсын бүртгэлийн хэлтсийн тасгийн дарга, нийслэлийн нэгдсэн үйлчилгээний цэг, төвийн улсын ахлах бүртгэгч нар болон орон нутгийн тойргийн нотариатч нар цахимаар оролцлоо.
