Орхон аймгийн ИТХ-ын дарга Д.Мөнхбат болон ИТХ-ын Нийгмийн хөгжлийн хорооны төлөөлөгчид Орхон аймгийн Улсын бүртгэлийн хэлтэст ажиллаж, байгууллагын үйл ажиллагаа, үйлчилгээний орчин нөхцөлтэй танилцлаа.
Танилцах үеэр иргэн, эд хөрөнгө, хуулийн этгээдийн улсын бүртгэлийн үйлчилгээний өнөөгийн нөхцөл байдал, иргэдэд үзүүлж буй үйлчилгээний хүртээмж, албан хаагчдын ажлын ачаалал, үйлчилгээний заалны хүрэлцээ, техник, тоног төхөөрөмжийн нөхцөл байдал болон цахим үйлчилгээний хэрэгжилтийн талаар мэдээлэл авч, санал солилцов.
Орхон аймгийн Улсын бүртгэлийн хэлтсийн урилгаар Хүний эрхийн үндэсний комисс ажиллаж, 2026 оны 03 дугаар сарын 24-ний өдрийн дүгнэлтээр хэлтсийн байрны зай талбай нь иргэдэд үйлчилгээ үзүүлэх хэрэгцээ шаардлагад хүрэлцэхгүй байгааг онцолсон. Үүнтэй холбоотойгоор үйлчилгээний орчин нөхцөлийг сайжруулах, техник, тоног төхөөрөмжийн шинэчлэл хийх, цаашлаад албаны байрны асуудлыг шийдвэрлэх чиглэлээр авч хэрэгжүүлж буй арга хэмжээний талаар танилцууллаа.
Мөн иргэдэд төрийн үйлчилгээг илүү түргэн шуурхай, чанартай хүргэх зорилгоор хэлтсийн техник, тоног төхөөрөмжийн шинэчлэл, байрны засварын асуудлыг судалж, ирэх оны төсөвт санал тусгах асуудлыг хэлэлцлээ.
